Schnitzelbangg 6. Klassen
1. Värs
Letscht Wuche das wird ych kuum vergässe,
bin ych mit dr' amdierende Miss Schwiz go Kinesisch ässe.
Die lange Bei, die schöne Hoor,
die tolli Figur, e' Draum wird woor.
Und wenn dir do's Bluet in d'Hoose rennt,
isch's dir egal wenn die's Matterhorn nit kennt.
2. Värs
Jetz isch au no dr' Räscht vom Jackson g'schdoorbe,
das hett mer dr' ganzi Daag verdoorbe.
Das uff däm Helge, da'sch glaub glaar,
isch dr' goldig Sarg vo däm Subberschtar.
Und das do, do das gleine Vääsli,
das isch d'Urne fir sy Nääsli.
3. Värs
Es hett kei Platz meh in unsere Zimmer,
und in de Käschte, isch's no schlimmer.
Au dr' Käller und dr' Eschtrig isch iibervoll,
in dr' Kuchi hetts au meh ass es soll.
Vo dääne Kaffikapsle hett's au unterem Bett,
nur well myyni dä Clooney nooni troffe hett.
4. Värs
E' Elsässer wo z' Basel schaffe wett,
schdoot vor däm Plakat mit dääne Minarett.
Dr' Schmbbedyss kunnt nimme drüss,
was schiesst denn do zem Boode-n-üss,
Jetzt haän sy z' Basel, all-em Aaschyyn aa,
bim Sparglestäche e' Kopfduech aa.
5. Värs
Dr' Federer seit im Färnseh, mied und g'schluucht,
ass är zwei Minute zem Wiggle bruucht.
und in finf Minute zää,
kenn är beidi Maitli e' Schobbe gää.
In dr' glyyche Zyt, das isch nit g'looge,
Hett dr' Tiger Woods 3 mool d' Frau bedrooge.
6. Värs
Ych bi uff Londe g'flooge mitti Jänner,
do muess ych in dä Ganzkerperscanner.
Die wänn my vo vorne und hinde gsee,
do seit dä am Bildschirm s'isch alle OKee.
Nur ebbis will ych ihne saage, ych bi so frei,
sy hänn e z'grossi Lääbere und Artrose in de Kney.
7. Värs
Dr' Vogel Gryff dä Danz im Jänner,
dä Fyyrdig dä isch nur fir d'Männer.
Im Hornig sott amme Fasnacht syy,
Im Merze isch sy scho sicher verbyy.
Im April do kemme d'Oschdergleggli,
d'Maitli draage kirzeri Reggli.
Dr' Muetterdaag findet im Maie statt,
dä findet vor allem d'Muetter glatt.
Im Juni sett me aafo schbaare,
dr'mit me ka in d Ferie faare.
Im Juli paggt me s'Bündeli,
und dreiht im Süüde Ründeli.
Im Augschte zwische Gras und Grüttli,
fyyre mer alli uff em Rütli.
Im Sebtämber das isch s'dumme,
sind d'Ferie au scho wiider umme.
Immer im Oggdoober es muess eso syy,
schällt s'Mässgleggli d'Herbschtmääs wiider yy.
Winter wird's denn z'mittst im Novämber,
dr' Niggi Näggi kunnt immer im Dezämber.
Und all baar Monet wird dä Labbi,
Hakan Yakin wiider Babbi.